Namlamb onttrek aan 2026 Invitational, maar nuwe formaat baan weg vir groter internasionale kompetisie

October 1, 2026

Die NamLamb-span moes ongelukkig aan die eerste Lamb Champs Invitational, wat op 31 Oktober 2026 by Silver Lakes Farm Hotel in Pretoria plaasvind, onttrek ná die uitbreking van bek-en-klouseer (BKS) in Namibië.

Die Namibiese span van tien lede is op 18 September amptelik in Windhoek aangekondig en sou kop-aan-kop teen tien Suid-Afrikaanse boere in die eerste internasionale weergawe van Lamb Champs meeding.

Namibië se Direktoraat Veeartsenydienste het sedertdien sommige van die beperkings wat ná die uitbreking ingestel is, gedeeltelik opgehef. Die uitbreking bly egter tot die Kharas-streek beperk en sekere beperkings op die beweging van diere bly van krag.

Gegewe die onsekerheid wat deur die uitbreking veroorsaak is, asook die biosekuriteitsoorwegings rondom die beweging van vee en diereprodukte, het NamLamb en Lamb Champs ooreengekom dat die Namibiese span aan vanjaar se kompetisie sal onttrek.

Francois Rossouw, stigter van Lamb Champs en HUB van Saai, sê die onttrekking is teleurstellend, veral ná die entoesiasme wat tydens die NamLamb-bekendstelling geheers het.

“Ons het minder as twee weke gelede in Windhoek gestaan en tien Namibiese boere voorgestel wat gereed was om Suid-Afrika aan te vat. Niemand wou hê hul reis moes só eindig nie. Dieregesondheid en biosekuriteit moet egter eerste kom, en ons ondersteun die verantwoordelike besluit wat deur die NamLamb-span geneem is ten volle.”

DIE INVITATIONAL GAAN VOORT

Die Lamb Champs Invitational sal op 31 Oktober by Silver Lakes Farm Hotel voortgaan, met ’n aangepaste kompetisieformaat wat in die komende week aangekondig sal word.

Volgens Rossouw het die terugslag die bestaansreg van die Invitational eerder versterk as verswak.

“Dit was nog altyd die bedoeling dat die Invitational veel groter as ’n eenmalige Suid-Afrika-teen-Namibië-kompetisie moet word. Ons bou ’n internasionale platform rondom die boer, sy produk en die verbruiker. Namibië se onttrekking verander die spanne wat vanjaar deelneem; dit verander nie waarheen ons met die konsep op pad is nie.”

Die Invitational verteenwoordig die volgende fase in die ontwikkeling van Lamb Champs – van ’n reeks streekskompetisies tot ’n kompetisie wat ontwerp is om ’n veel groter gehoor te bereik.

Vir die eerste keer sal die Invitational regstreeks oor verskeie media- en verspreidingsvennote uitgesaai word, met ’n gesamentlike potensiële bereik van meer as 1,5 miljoen kykers.

Dit verander die omvang van die blootstelling wat deelname aan Lamb Champs aan ’n boer kan bied.

“’n Boer wat aan een van ons streekskompetisies deelneem, het tradisioneel die geleentheid gehad om sy produk op die dag aan ’n paar duisend mense bekend te stel. Die Invitational gee ons die vermoë om dieselfde boer, sy plaas, sy ras en sy produk na ’n gehoor te neem wat potensieel in die honderdduisende gemeet kan word,” sê Rossouw.

“Daardie blootstelling maak saak. Landbou het platforms nodig waar verbruikers die mense kan ontmoet wat werklik hul kos produseer. Die boer behoort nie iewers tussen die plaashek en die winkelrak te verdwyn nie.”

VAN KOMPETISIE TOT INTERNASIONALE PLATFORM

Die Invitational word ontwikkel as ’n vermaakgedrewe landboukompetisie waarin die boere en hul produkte steeds die hoofrolspelers is.

In plaas daarvan om slegs op toeskouers by die geleentheid staat te maak, is die nuwe format ontwerp vir sowel ’n gehoor by die geleentheid as kykers wat dit op afstand volg.

Rossouw glo dit sal die formaat toenemend relevant maak vir boere, landbouhandelsmerke en verbruikers.

“As ons wil hê landbou moet om mense se aandag meeding, kan ons nie verwag dat verbruikers altyd na ons toe moet kom nie. Landbou moet ook gaan waar die gehoor is.”

“Lamb Champs neem iets ongelooflik eenvoudig – boere wat meeding om te bepaal wie die lekkerste lamsvleis produseer – en gebruik dit om verbruikers bekend te stel aan rasse, boerderystreke, produksiestelsels en, die belangrikste van alles, die mense agter hul kos.”

Die internasionale komponent sal daarom sentraal tot die toekoms van die Invitational bly.

Namibië bly deel van die langtermynvisie, terwyl spanne uit twee bykomende lande beplan word om in 2027 by die kompetisie aan te sluit. Dit sal die Invitational verder as die oorspronklike formaat tussen twee lande uitbrei.

“Ons het begin met die idee van twee lande en twintig boere. Wat ons nou bou, het die potensiaal om ’n jaarlikse internasionale vertoonvenster vir skaapboere te word,” sê Rossouw.

“Die werklike prys is nie bloot om te bepaal wie die lekkerste lamsvleis produseer nie. Dit is om ’n platform te skep wat waardevol genoeg is dat boere uit verskillende lande daarop wil meeding, verbruikers daarna wil kyk en landbouondernemings daarmee geassosieer wil word.”